Балачакка кайтам

Балачакка кайтам, балачакта
Атлы чана көтә, ак юллар... 
Шул юллардан, мине каршыларга
Йөгереп килер кебек ак еллар.

Атлы чана, шикәр кебек ак юл –
Минем хәтер шуннан башлана.
Шуннан өзелмичә дәвам итә...
Һава салкын, яка бәсләнә.

Әнкәй миңа мамык шәлен урый,
Әткәй кызулата «Кашка»ны.
Колагымнан китмәс әтиемнең:
«На, малкай», – дип атка дәшкәне.

Балачакка кайтам, ак юлларда
Хәтер йомгагымны сүтәрмен.
Сары каеш дилбегәсен тотып,
Ак атларда кабат үтәрмен.

Әнкәй миңа мамык шәлен урар,
Әткәй салып бирер чикмәнен.
Балачакка кайтам. Әткәй-әнкәй,
Сезне бүтән ташлап китмәмен.

Фото: https://ru.freepik.com/

«Мәйдан» № 8, 2024 ел