Кайтырмын

Шигырь.

Яннарыңда булмасам да
Сакла кулым җылысын,
Күрешәсе мизгелләргә
Күңелкәең ышансын.

Мөлдерәмә күзләреңә,
Тутырып бер карасам.
Ерак юлларда йөргәндә
Беркайчан да адашмам.

Беразга киткән чагымда
Ишекләрне бикләмә,
Болай да авыр тормышка
Саллы йозаклар элмә.

Тиз арада мин кайтырмын
Эзләрем дә суынмас,
Кулларыңдагы җылымны
Вакыт җиле туздырмас.

Алсу ГАЛЕЕВА, Актаныш