«Каян килә шигырь?!»...

«Каян килә шигырь?!» —
Диеп сорый
Таныш-белеш, дуслар, туганнар.
Әйтә алмыйм, чөнки
Үзем белмим... —
Шигырь яза кебек уйчаннар.
«Шигырь язам!» — диеп
Утырган юк —
Ташып чыга баскан килеш тә.
Әллә миннән чыга,
Әллә җаным
Күктән иңгән моңнар ишетә?
Берәү ишетмәгән
Ул тын моңны
Нинди көчләр миңа иңдерә?!
Дулкын озынлыгы
Аның, бәлки,
Минем күңелемә тиң килә?
Таштай каткан җанга
Һичнинди моң
Тәэсир итә алмый, күрәсең...
Минем күңел йомшак,
Син, Табигать,
Толым-толым шигырь үрәсең...

Рифат ҖАМАЛ

Фото: https://ru.freepik.com/Изображение от Freepik