Яшен суы

Кырык эшем тора кулга сорап,
Ник берсең дә булмый күтәреп?
Читлектәге усал җәнлек кебек,
Үз-үземә йөрим үртәлеп.

Чыгып китәм кинәт тар бүлмәдән,
Кулым селтәп китәм барсына.
Йөргәнмени көтеп якын дустың, –
Кояш баса көлеп каршыма.

Явып киткән йомшак, җылы яңгыр,
Күл җыелган яшел болында.
Түгә-түгә дымсу чәчәкләргә,
Битем юам яшен суында.

Җиңеләеп кала сулышларым,
Җиләс җилләр үтә кагылып...
Җитә кайчак тере бер чаткы да,
Китсен өчен йөрәк кабынып.

1960

Фото: https://ru.freepik.com/Изображение от jcomp на Freepik