Кабат кайттым

Туган җиргә кабат кайттым,
Кошлар сыман, яз җиткәч.
Сагыну-сагышларым булып,
Елгада ташу үткәч.
Әрәмәдә шомырт исе,
Ак чәчәктә һәр куак.
Шушма агымы колакта –
Җыр суза иске улак.
Яз җилләре назлап үбә,
Яз җилләре сөйкемле.
Туган җирем, шушы яздай,
Ят зат итми һичкемне.
Кошлар кайтып оя корган,
Шатлыклары – җырларда.
Тынгылыклар табам бары
Чыксам иркен кырларга.
Кайттым кабат туган җиргә
Яз гөлләрен күрергә,
Хәтер йомгакларын сүтеп,
Моңнардан җыр үрергә.
 

Гөлфия ИСХАКОВА

Фото: omet-rb.com